ಇದು ಕಾಲನ ಕಣ್ಣು

(Auge der Zeit: ಸೆಲಾನ್)

ಇದು ಕಾಲನ ಕಣ್ಣು:
ಅದು ಓರೆಯಾಗಿ ದಿಟ್ಟಿಸುತ್ತದೆ
ಸಪ್ತವರ್ಣದ ಕಣ್ಣಹುಬ್ಬಿನ ಕೆಳಗೆ.
ಅದರ ರೆಪ್ಪೆ ತೊಳೆಯಲ್ಪಡುವುದು ಬೆಂಕಿಯಿಂದ,
ಅದರ ಕಣ್ಣೀರು ಸುಡುವ ಆವಿ.

Auge der Zeit; Courtesy: Intercultural Philosophy and Art @ http://www.galerie-inter.de

ಕುರುಡುತಾರೆಗಳು ಹಾರುತ್ತವೆ ಅದರತ್ತ
ಮತ್ತು ಕರಗುತ್ತವೆ ಕಣ್ಣೆಮೆ ಮೇಲೆ ಅದರ ಬಿಸಿಗೆ:
ಅದು ಇನ್ನಷ್ಟು ಬಿಸಿಯಾಗುತ್ತಿದೆ ಜಗದಲ್ಲಿ
ಮತ್ತು ಸತ್ತಿರುವುದು
ಬೆಳೆಯುತ್ತಿದೆ ಮತ್ತು ಅರಳುತ್ತಿದೆ.

ಅಲ್ಲಿತ್ತು ಇಳೆ ಅವರೊಳಗೆ

(Es War Erde in Ihnen: ಸೆಲಾನ್)

ಅಲ್ಲಿತ್ತು ಇಳೆ ಅವರೊಳಗೆ, ಮತ್ತು
ಅಗೆದರವರು.

ಅವರಗೆದರು ಮತ್ತು ಅಗೆದರವರು, ಹೀಗೆ ಕಳೆಯಿತು
ಅವರಿಗಾಗಿ ಅವರ ಹಗಲು, ಅವರ ರಾತ್ರಿ. ಮತ್ತು ಅವರು ಪರಾಕಿಸಲಿಲ್ಲ ದೇವನ,
ಯಾರು, ಹಾಗೆಂದು ಕೇಳಿದ್ದರವರು, ಇವೆಲ್ಲವನ್ನ ಬಯಸುವನೋ,
ಯಾರು, ಹಾಗೆಂದು ಕೇಳಿದ್ದರವರು, ಇವೆಲ್ಲವನ್ನ ತಿಳಿದಿರುವನೋ.

ಅಗೆದರವರು ಮತ್ತು ಹೆಚ್ಚೇನನ್ನೂ ಆಲಿಸಲಿಲ್ಲ;
ಅವರು ಪ್ರಾಜ್ಞರಾಗಿ ಬೆಳೆಯಲಿಲ್ಲ, ಯಾವ ಹಾಡನ್ನೂ ಕಟ್ಟಲಿಲ್ಲ,
ತಮಗಾಗಿ ಯೋಚಿಸಿಕೊಳ್ಳಲಿಲ್ಲ ಯಾವ ನುಡಿಯನ್ನೂ.
ಅಗೆದರವರು.

ಬಂತಲ್ಲೊಂದು ನೀರವತೆ, ಬಂತಲ್ಲಿ ಕೂಡಾ ಒಂದು ಬಿರುಗಾಳಿ,
ಬಂದವಲ್ಲಿಗೆ ಮಹಾಸಾಗರಗಳೆಲ್ಲ.
ನಾನಗೆವೆ, ನೀನಗೆವೆ ಮತ್ತು ಆ ಹುಳುವು ಸಹಾ ಅಗೆಯುತ್ತದೆ,
ಮತ್ತು ಅಲ್ಲಿ ಹೊರಹೊಮ್ಮುವ ಹಾಡು ಹೇಳುತ್ತಿದೆ: ಅಗೆಯುತ್ತಿರುವರವರು.

ಓ ಒಬ್ಬನು, ಓ ಇಲ್ಲ ಒಬ್ಬನೂ, ಓ ಯಾರೂ ಇಲ್ಲ, ಓ ನೀನು:
ಎಲ್ಲಿಗೆ ಹೋಗಿತ್ತು, (ದಾರಿ) ಅದೆಲ್ಲಿಗೂ ಹೋಗದಿದ್ದಾಗ?
ಓ ನೀನಗೆವೆ ಮತ್ತು ನಾನಗೆವೆ, ಮತ್ತು ನಾನಗೆದುಕೊಳ್ಳುವೆ ನಿನ್ನತ್ತ,
ಮತ್ತು ಬೆರಳುಗಳ ಮೇಲೆ ಏಳುತ್ತದೆ ನಮ್ಮ ಉಂಗುರ.